ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន ព្រមានដកតំណែងមន្ត្រីជាន់ខ្ពស់រដ្ឋាភិបាលណាម្នាក់ដែលបន្តជិះឡានអត់ពន្ធ និងចង្កូតស្ដាំតទៅទៀត។

ក្នុងកិច្ចប្រជុំគណៈរដ្ឋមន្ត្រីកាលពីថ្ងៃទី៨ ខែតុលាសម្ដេចតេជោបានបញ្ជាឲ្យកងកម្លាំងប្រដាប់អាវុធ ចាប់ពីថ្ងៃទី១ ខែកក្កដា ឆ្នាំ២០២២ ត្រូវសហការជាមួយគយដើម្បីបង្កើនការទប់ស្កាត់រថយន្តគ្មានពន្ធ និងឲ្យរាយការណ៍មកសម្ដេចប្រសិនជាឃាត់បានរថយន្តគ្មានពន្ធដែលប្រើប្រាស់ដោយមន្ត្រីជាន់ខ្ពស់ណាម្នាក់ដើម្បីឲ្យសម្ដេចមានវិធានការដោយផ្ទាល់។

ក្នុងសេចក្ដីប្រកាសព័ត៌មាននៅថ្ងៃទី៨ ខែតុលា ទីស្ដីការគណៈរដ្ឋមន្ត្រីបានលើកឡើងថា៖ «ក្នុងករណីចាំបាច់ ប្រសិនបង្ក្រាបបានរថយន្តសេរីទំនើបគ្មានពន្ធដែលម្ចាស់ជាមេទ័ព មេប៉ូលីស ឬជាអ្នកធំក្នុងជួររាជរដ្ឋាភិបាល តំណាងរាស្ត្រ និងសមាជិកព្រឹទ្ធសភា ជាដើម ដែលមិនគោរពច្បាប់និងបន្តប្រើប្រាស់រថយន្តនោះ ត្រូវរាយការណ៍អំពីអត្តសញ្ញាណម្ចាស់ រថយន្តជូន សម្តេចតេជោនាយករដ្ឋមន្ត្រី ដើម្បីសម្ដេចមានវិធានការដកមុខតំណែង និង បណ្តេញចេញពីគណបក្សថែមទៀត៖» ។

ដើម្បីបញ្ចប់នូវបញ្ហារថយន្តគ្មានពន្ធ រដ្ឋាភិបាលបានទុកពេលឲ្យម្ចាស់យានយន្តដែលមិនទាន់បង់ពន្ធទាំងអស់ត្រូវធ្វើការបង់ពន្ធដោយមានការអនុគ្រោះពន្ធរហូតដល់ថ្ងៃទី៣១ ខែធ្នូ ឆ្នាំ២០២១។ ផុតពីថ្ងៃកំណត់នេះម្ចាស់យានយន្តដែលគ្មានពន្ធត្រូវបង់នៅក្នុងតម្លៃពេញ ១០០ភាគរយនឹងត្រូវបន្ថែមនូវការផាកពិន័យមួយចំនួនទៀតផងដែរ៕